Du bass Schrëftsteller, mir sinn däi Verlag
Du muss mat dengem Buch net an e bestëmmt Schema passen, fir bei eis ze kommen. Vläicht schreifs du grad un dengem éischte Wierk. Vläicht hues du schonn e puer Bicher verëffentlecht a wëlls beim nächste Buch en anere Wee goen. Béides ass fir eis en Ufank, keen Uerteel iwwer dech oder däin Text.
Mir sinn eng Kreativschmëdd. Eng Iddi däerf hei déi Form fannen, déi zu hir an zu dir passt. Dofir froe mir net, ob däi Buch eisem perséinleche Goût entsprécht. Mir wëlle wëssen, wat s du verëffentleche wëlls a wéi s du dir et virstells. Mir beroden dech, bréngen eist Verlagshandwierk mat an a schaffen zesumme mat dir un engem Wee, deen s du verstees an och matdroe kanns.
Dozou gehéiert och, éierlech iwwer d’Méiglechkeeten, den Opwand an d’Käschten ze schwätzen. E Buch soll mat Suergfalt gemaach ginn. Et soll awer net dorunner scheiteren, datt de Wee bis zur Verëffentlechung fir dech onverhältnisméisseg deier gëtt. Zesumme siche mir no enger Ausféierung, déi dengem Wierk gerecht gëtt an déi fir dech bezuelbar bleift.
Mir wëllen net iwwer deng Iddi bestëmmen. Mir wëllen dir zur Säit stoen, fir datt doraus eng Verëffentlechung gëtt.
Mat Ustand, Gewëssen an dem Respekt, deen däi Wierk verdéngt.
[ ■ Weider]
Däi Wierk ass bei eis keng Nummer.
Wann s du mat dengem Buch bei eis kënns, sëtz du net engem anonyme Selektiounsgremium géintiwwer. Du schwätz mat deene Leit, déi däi Wierk begleeden an dorunner schaffen. Ob Kannerbuch, Roman, Thriller, Science-Fiction-Wierk, Kachbuch, Zeechebuch, Molbuch, Spillbuch oder Bastelbuch: Et spillt keng Roll, a wéi eng Schublad deng Iddi géif passen. Mir wëllen dat Wierk verëffentlechen, dat s du doraus maache wëlls. Dofir muss du bei eis och kee Manuskript zur Bewäertung areechen.
Zesummen hu mir méi wéi 40 Joer Erfarung mat Texter, Gestaltung an der Produktioun vu Bicher. Mir kennen d’Handwierk hannert enger Verëffentlechung: vun der Aarbecht un der Sprooch an de Säiten iwwer de Cover bis hin zum fäerdege Buch. Dës Erfarung gëtt eis net d’Recht, iwwer deng Iddi ze bestëmmen. Si hëlleft eis, Méiglechkeeten ze erkennen, Entscheedungen ze erklären an däi Wierk propper ëmzesetzen.
Mir verlaangen net, datt däi Buch fir d’éischt an e festgeluechte Schema passt. Mir schreiwen dir weder eng bestëmmte Form nach eng Oplo vir, déi s du net wëlls. Iwwer d’Aarbechtsschrëtt an d’Käschte schwätze mir oppen, éier s du dech entscheeds. Däi Wierk an däin Urheberrecht bleiwen bei dir. Produzéiert gëtt no deem, wat mir mat dir ofgemaach hunn a wat s du fräiginn hues.
Eis Aufgab ass et, däi Wierk ze produzéieren, ze verëffentlechen a bekannt ze maachen. Mir begleeden dech mat dengem Wierk bis bei dat Zil, dat s du dir wënschs, an ënnerstëtzen dech dobäi, datt et seng Lieser fënnt an déi beschtméiglech Chance op Erfolleg kritt. Du bass den Auteur. Mir sinn de Verlag un denger Säit.
[ ■ Weider ]
Mir schaffen un dengem Wierk.
Wa mir zesummesëtzen, schwätze mir doriwwer, wat s du geschriwwen hues a wou s du eis Ënnerstëtzung wënschs. Vläicht ass däi Wierk schonn fäerdeg. Vläicht wëlls du nach un eenzele Stelle weiderschaffen, eng Iwwersetzung derbäisetzen oder aus dengem Text iwwerhaapt nach e Buch maachen. Zesumme leeë mir fest, wéi eng Aarbechten s du eis uvertraus.
Beim Lektorat liese mir opmierksam a weisen dech op Feeler, Onkloerheeten a Stellen hin, bei deenen e Saz net dat ausdréckt, wat s du soe wollts. Mir kënnen dir och eng aner Formuléierung virschloen. Ob s du se iwwerhëls, entscheeds du. Deng Wuertwahl an däin Toun gehéieren zu dengem Wierk. Mir ersetzen se net duerch eis Sprooch a maachen aus engem eegestännegen Text keen Text, deen einfach nëmmen enger Norm entsprécht.
Dat gëllt och fir bewosst Entscheedunge bei der Schreifweis. Wann s du déi al Rechtschreiwung léiwer hues, en däitscht ß benotze wëlls oder léiwer ss schreifs, schwätze mir doriwwer an hale eis un déi Form, déi s du fir däi Wierk auswiels. Och eng ongewéinlech Punktuatioun ännere mir net einfach, nëmme well se eis ongewinnt virkënnt. Mir froen no, wa mir net erkenne kënnen, ob eppes bewosst esou geschriwwe gouf oder ob sech e Feeler ageschlach huet. En ëmgedréint „udn“ amplaz vun „und“ fanne mir a korrigéieren et. Grammatesch Hiweiser gi mir dir do, wou se hëllefe kënnen. Du muss se net iwwerhuelen, wann s du dech bewosst anescht ausdrécke wëlls.
Wann s du beim Schreiwen Ënnerstëtzung brauchs, schaffe mir mat dir un deene Stellen, wou s du net weiderkënns. Beim Korrekturliesen siche mir no iwwersiene Schreiffeeler, vertauschte Buschtawen an anere Feeler, déi am fäerdegen Text net solle stoe bleiwen. Soll däi Wierk och an enger anerer Sprooch erauskommen, schwätze mir iwwer eng Iwwersetzung, déi säin eegene Toun eescht hëlt.
Duerno gi mir dengem Wierk seng sichtbar Form. Beim Buchsaz gestalte mir d'Säiten esou, datt Text a Biller gutt zur Geltung kommen. Fir de Cover an d’Illustratiounen kanns du eis deng Iddien, Skizzen, Biller a Beispiller weisen. Du kanns eis soen, wat s du dir virstells, oder eis domat beoptragen, d’Gestaltung fir dech z’entwéckelen. Mir weisen dir d’Entwërf a schaffen duerno mat dengem Feedback weider.
Däi Wierk bleift däi Wierk.
Mir hëllefen dir beim Schreiwen, Iwwerpréiwen, Iwwersetzen a Gestalten. Doduerch gëtt et net zu engem vun eise Wierker. Deng Gedanken, deng Stëmm an deng Entscheedunge bleiwen doranner erkennbar.
■ Weider
Däi Buch kritt alles, wat et brauch.
Wann den Text an d’Gestaltung fäerdeg sinn, bereede mir däi Wierk op seng Verëffentlechung vir. Dozou gehéieren d’Angabe fir däin Impressum, bei deem deng privat Adress duerch eis **richteg lëtzebuergesch Adress** geschützt bleift, fir 33 Euro d’Joer, soulaang s du de Service benotz. Dozou gehéieren och déi fäerdeg Dateie fir déi Ausgab, déi s du dir wënschs, an d’ISBN, fir den Drock an, wann s du wëlls, och fir d’E-Book. D’Vergabe vun der ISBN selwer ass bei eis als lëtzebuergesche Verlag gratis. Mir verrechnen nëmmen eng eemoleg Verwaltungsgebühr vun 10 Euro pro ISBN, bei Drock an E-Book zesummen also eemoleg 20 Euro, amplaz vun de ronn 150 bis 200 Euro, déi eleng zwou ISBNen an Däitschland kaschte géifen. Wann s du däi Buch och digital verëffentleche wëlls, erstelle mir zousätzlech en E-Book a verschiddene Formater.
Wéi däi Buch erauskomme soll, entscheede mir zesumme mat dir. Et kann e Softcover oder en Hardcover ginn, e praktescht Buch fir ënnerwee oder e méi grousst Format, dat Biller an Illustratioune vill Plaz gëtt. Och speziell Formater si méiglech. Mir schwätze mat dir iwwer d’Méiglechkeeten an doriwwer, wat se kaschten, éier eppes beoptraagt gëtt. Däi Buch muss net an e virgegebent Mooss passen.
Zu enger Verëffentlechung gehéiert fir eis och d’Fro, wéi vill Exemplairen am Ufank sënnvoll sinn. Net all Auteur wëll oder kann direkt eng grouss Oplo bezuelen. Dofir kënne mir e Buch, wann néideg, a klenge Quantitéite produzéiere loossen oder eréischt dann, wann eng Bestellung erakënnt, ähnlech wéi beim Drock op Bestellung. Wann eng méi grouss Oplo sënnvoll ass, si mir och bereet, se virzefinanzéieren an d’Konditiounen dofir oppen mat dir ofzeschwätzen.
Mir wëllen, datt däi Buch erauskomme kann, ouni datt s du dech dofir an eng Scholdefal bréngs. Du solls net Jore méi spéit mat 20.000 Euro Scholden do stoen, nëmme well däi Buch kee Milliardenerfolleg ginn ass. Mir schwätze mat dir iwwer e Wee, deen zu dengem Wierk, dengen Ziler an dengen finanzielle Méiglechkeete passt. Éier s du dech entscheeds, weess du, wéi eng Käschten entstinn a wien se iwwerhëlt.
Däi Wierk bleift däi Wierk. Mir këmmeren eis ëm dat, wat et fir seng Verëffentlechung brauch, a fannen zesumme mat dir eng Ausgab, hannert där s du och finanziell stoe kanns.
[ ■ Weider ]
Esou kënnt däi Buch bei seng Lieser.
Éier mir drécken, entscheede mir zesumme mat dir, wéi däi Buch soll ausgesinn a sech ufillen. Du kanns dir Pabeier, Gréisst, Ëmschlag an Bindung wënschen. Vläicht soll et en Hardcover ginn, vläicht e Softcover, eng Broschür oder eng Zeitung. Mir weisen dir, wat méiglech ass, recommandéiere passend Materialien an erklären dir, wat déi verschidden Entscheedunge kaschten.
Dobäi kucke mir net nëmmen dorop, wat schéin ausgesäit. Mir beroden dech och dozou, ob däi Buch zu engem Präis hiergestallt ka ginn, bei deem et sech nach gutt verkafe léisst. E besonnesche Pabeier oder eng opwendeg Bindung kann genee dat Richtegt fir däi Wierk sinn. Du solls awer virun der Entscheedung wëssen, wat dat fir d’Produktioun an de spéidere Verkaf bedeit. Mir plange mat dir esou, datt s du net onbemierkt an eng Käschtefal geréits.
Wann s du d’Ausgab fräiginn hues, drécke mir däi Buch an där Form, déi mir mat dir ofgemaach hunn, an eise Partnerdréckereien, déi Deel vun eisem Betrib sinn. Duerno bidde mir et an eisem Webshop un a stelle et Bibliothéiken a Librairien vir. Mir huelen et mat op eis Verkafsstänn, op Foiren an op Evenementer, un deene mir deelhuelen. Esou läit däi Buch net einfach nëmme fäerdeg gedréckt do: Mir schaffen dorunner, datt d’Leit et gesinn an et kenne léieren.
Wann s du wëlls, bass du als Autorin oder Auteur dobäi. Du kanns eis op Foiren an Evenementer begleeden, mat Lieser schwätzen an däi Wierk selwer virstellen. Op Wonsch schwätze mir och mat Bibliothéiken iwwer Liesungen. Dozou kënne mir Lieszeechen, Visittekaarten an Flyeren fir däi Buch gestalten an hierstellen, fir datt s du bei enger Begéignung eppes an d’Hand gi kanns.
Vum Pabeier bis bei de Verkafsstand kriss du dës Aarbecht aus enger Hand. Mir produzéieren däi Buch, bidde et un a begleeden dech dobäi, et bekannt ze maachen. Wéi eng Méiglechkeete mir fir däi Wierk notzen, schwätze mir mat dir of. Däi Buch bleift däi Buch, och wa mir zesummen dofir suergen, datt et säi Wee bei d’Lieser fënnt.